ලාේක විශ්වවිද්‍යාලයීය ක්‍රීඩා තරඟාවලිය නිමාවට

Summer Universiade 2019 නොහොත් ලෝක විශ්වවිද්‍යාලීය ක්‍රීඩා තරඟාවලිය ඉතාලියේ Naples නුවරදී ජූලි මස 3 වැනිදා ආරම්භ වූ අතර ජූලි මස  14 වැනිදා මෙම තරඟාවලිය අති උත්කර්ෂවත් අන්දමින් අවසන් විය. ක්‍රීඩා අංශ 18 කින් සමන්විත මෙම තරඟාවලිය සඳහා ලොව පුරා විශ්ව විද්‍යාල ශිෂ්‍ය ශිෂ්‍යාවන් දහස් සංඛ්‍යාත පිරිසක් සහභාගී වූ අතර ශ්‍රී ලංකාව නියෝජනය කරමින් සහභාගි වූ කණ්ඩායම මෙහෙය වීම සඳහා කොළඹ විශ්ව විද්‍යාලයේ යසිත රංගන ද සිල්වා කණ්ඩායම් නායකයා වශයෙන් ද ශ්‍රී ජයවර්ධනපුර විශ්වවිද්‍යාලයේ එරන්දි වරුසවිතාන උප නායිකාව වශයෙන් ද තේරී පත් වීය.

තරඟ ඉසව් 220 ක්‍ අන්තර්ගත වූ NAPOLI 2019 තරඟාවලියේ 100×4 කාන්තා සහය දිවීම තරඟ ඉසව්වෙන් ශ්‍රී ලංකා කණ්ඩායම 14 වන ස්ථානය අත්පත් කර  ගත්හ. ශ්‍රී ජයවර්ධනපුර විශ්ව විද්‍යාලයේ අක්ශනා මොරලන්ද, ශානිකා දුලක්ෂි, I.G.I. ශ්‍රීමාලි සහ සබරගමුව විශ්ව විද්‍යාලයේ ඔමායා උදයන්ගනී කණ්ඩායම නියෝජනය කරන ලදී. 100×4 පිරිමි තරඟ ඉසව්ව නියෝජනය කරමින් කොළඹ විශ්ව විද්‍යාලයේ ගිහාන් රණවීර, ශ්‍රී ජයවර්ධනපුර විශ්වවිද්‍යාලයේ මලින් උදය, සබරගමුව විශ්ව විද්‍යාලයේ කවිඳු අරලිය සහ රුහුණු විශ්ව විද්‍යාලයේ පසිඳු පියතිලක සහභාගී වී 14 ස්ථානය ළඟා කර ගත්හ. රුහුණු විශ්වවිද්‍යාලයේ කුෂාන් ඩයස්, සබරගමුව විශ්ව විද්‍යාලයේ යොහාන් කාවින්ද, කවිඳු ලක්නාත් සහ ශ්‍රී ජයවර්ධනපුර විශ්වවිද්‍යාලයේ ඉෂාන් ලහිරු යන ක්‍රීඩකයින් ගෙන් සැදුම් ගත් කණ්ඩායම 400×4 පිරිමි සහය දිවීමේ තරඟයෙන් 15 වන ස්ථානයට පත් වීය.

මේස පන්දු කාන්තා යුගල තරගාවලියේ ඔස්ට්‍රේලියානු කණ්ඩායම පරාජය කිරීමට වයඹ විශ්ව විද්‍යාලයේ පවනි සිරිසේන සහ සබරගමුව විශ්ව විද්‍යාලයේ තේදිනී ජයවර්ධන සමන්විත විය. එහි පිරිමි තරඟ ඉසව්ව නියෝජනය කරමින් සහභාගි වූ මොරටුව විශ්ව විද්‍යාලයේ සුපුන පූර්ණිම වරුසවිතාන සහ මෙවන් අබේවික්‍රම නෙදර්ලන්ත කණ්ඩායම පරාජය කරන ලදී. මේස පන්දු කාන්තා කේවල තරගාවලියේදී ඇමරිකානු ක්‍රීඩිකාව පරදා සබරගමුව විශ්ව විද්‍යාලයේ තේදිනී ජයවර්ධන ජයග්‍රහණය කරන ලදී. වයඹ විශ්ව විද්‍යාලයේ පවනි සිරිසේන කැනේඩියානු ක්‍රීඩිකාව පරාජය කරමින් ජයග්‍රහණය අත් කර ගැනීමට සමත් විය.

ටෙනිස් පිරිමි කේවල තරඟ ඉසව්ව නියෝජනය කරමින් සහභාගි වූ කොළඹ විශ්ව විද්‍යාලයේ යසිත රංගන ද සිල්වා, සෞදි අරාබියානු ක්‍රීඩකයා පරදවමින් ජයග්‍රහණය කරන ලදී.

සමස්ත තරඟාවලියෙන් පදක්කම්  82 ක් ලබා ගනිමින් ජපානය සහ රුසියානු ජනරජය ප්‍රථම ස්ථානය අත් කර ගැනීමට වාසනාවන්ත වූ අතර තෙවන ස්ථානය දිනා ගැනීමට පදක්කම් 53 ක් ලබා ගනිමින්  ඇමරිකා එක්සත් ජනපදය සමත්විය.

වසර දෙකකට වරක් පවත්වන මීළඟ ලෝක විශ්ව විද්‍යාලීය ක්‍රීඩා තරඟාවලිය 2021 වර්ෂයේ දී චීනයේ Chengdu නුවරදී පැවත්වීමට නියමිතය.

Perabeats කණ්ඩායමේ අප ශ්‍රී ලංකා කණ්ඩායම නියෝජනය කරමින් සහභාගි වූ ශිෂ්‍ය ශිෂ්‍යාවන්ට උණුසුම් සුභ පැතුම් එක් කරමු.

රචනය – සිතුනි මිමාෂා

Photo Courtesy – www.fisu.net