2019 ලෝක විශ්ව විද්‍යාල ක්‍රීඩා තරඟාවලිය ඇරඹෙයි

July 5, 2019
, 6:31 PM
, perabeats Articles, World University Games
Posted by perabeats

Summer universiade නොහොත් World University games සමාරම්භක තරඟාවලිය ඉතාලියේ Turin නගරයේදී පවත්වා ඇත.වසර දෙකකට වරක් පවත්වන මෙම තරඟාවලිය මේ වසරේදී නැවතත් වසර හැටකට පසුව ඉතාලියේ Naples නුවරදී ජූලි 3 සිට ජූලි 14 දක්වා පැවැත්වේ. ක්‍රීඩක ක්‍රීඩිකාවන් සහ පුහුණු කරුවන් අට දහසකට අධික පිරිසක් සහභාගී වන මෙම තරඟාවලියෙදී 2020 වර්ෂයේ ජපානයේ Tokyo නුවරදී පැවැත්වීමට නියමිත ඔලිම්පික් ක්‍රීඩා උළෙලට ක්‍රීඩක ක්‍රීඩිකාවන් තෝරාගැනීමට ද නියමිතය. ක්‍රීඩාගාර, ධාවන පථ සහ ඉතාලියානු ආහාර පාන වැනි පහසුකම් වලින් සමන්විත සුඛෝපභෝගී නෞකා දෙකක් මෙම ක්‍රීඩා උළෙල සඳහා සහභාගී වන ක්‍රීඩක ක්‍රීඩිකාවන්ගේ නේවාසිකාගාර පහසුකම් සඳහා යොදා ගෙන ඇත. තරඟ ඉසව් 18 කින් සමන්විත මෙම තරඟාවලියේදී විනිශ්චය කටයුතු සඳහා අධි තාක්ෂණික උපකරණ භාවිතා කිරිමට නියමිතය.

ශ්‍රී ලංකාව නියෝජනය කරමින් සහභාගි වන විශ්ව විද්‍යාලයීය ශිෂ්‍ය ශිෂ්‍යාවන් රැසකින් සමන්විත කණ්ඩායමේ නායකත්වය කොළඹ විශ්ව විද්‍යාලයේ යසිත රංගන ද සිල්වා දරන අතර ශ්‍රී ජයවර්ධන පුර විශ්වවිද්‍යාලයේ එරන්දි වරුසවිතාන උප නායකත්වය හොබවයි.

ශ්‍රී ජයවර්ධනපුර විශ්ව විද්‍යාලයේ නිදීශා එල්ලාවල, කොළඹ විශ්ව විද්‍යාලයේ හිමානි විතානගේ, පේරාදෙණිය විශ්ව විද්‍යාලයේ තිසරි කරුණාතිලක සහ ශ්‍රී ජයවර්ධනපුර විශ්වවිද්‍යාලයේ කවිශානි විමලරත්න යන ක්‍රීඩකාවන් පිහිනුම් අංශයෙන් තරඟ වැදීමට නියමිතය.තරඟ නායකයා වශයෙන් රුහුණු විශ්ව විද්‍යාලයේ කළණ වීරමුණි සහ නායිකාව වශයෙන් ශ්‍රී ජයවර්ධනපුර විශ්වවිද්‍යාලයේ නිදීශා එල්ලාවල තේරී පත් වී ඇත.

මේස පන්දු අංශයෙන් මොරටුව විශ්ව විද්‍යාලයේ මෙවන් අබේවික්‍රම ක්‍රීඩකයා සහ නුවනි විතානගේ ක්‍රීඩිකාව තරඟ වැදීමට නියමිතය.මළල ක්‍රීඩා අංශයේ නායකයා ලෙස සබරගමුව විශ්ව විද්‍යාලයේ කවිඳු අරලිය ක්‍රීඩකයා ද නායිකාව ලෙස රුහුණු විශ්ව විද්‍යාලයේ පියුමි අහිංසා ජයමිණි ක්‍රීඩිකාව තේරී පත්වී ඇත.ටෙනිස් අංශයෙන් කොළඹ විශ්ව විද්‍යාලයේ යසිත රංගන ද සිල්වා ශිෂ්‍යා සහ මොරටුව විශ්ව විද්‍යාලයේ මධූෂි රාජේන්ද්‍රන් ශිෂ්‍යාව නායකත්වය දැරීමට නියමිතය.

Taekwondo කණ්ඩායමේ නායකත්වය කැළණිය විශ්ව විද්‍යාලයේ කළිඳු කවිෂාන් විසින් දරන අතර නායිකාව ලෙස කොළඹ විශ්ව විද්‍යාලයේ මාධවී ජයවීර කටයුතු කරයි.

මෙම තරඟාවලියේ අරමුණ හුදෙක් ක්‍රීඩාව දියුණු කිරීම පමණක් නොවන අතර අනාගත ලෝක නායකයන් වීමට සුදුස්සන් එක්රැස් කිරීම බවට අන්තර්ජාතික විශ්ව විද්‍යාලීය ක්‍රීඩා සංගමයේ සභාපති Oleg Matytsin මහතා ප්‍රකාශයක් නිකුත් කර ඇත. ශ්‍රී ලංකාව නියෝජනය කරමින් සහභාගි වන අපේම සහෝදර සහෝදරියන් හට ජයග්‍රහණය සදහා සුභාශිංෂන එක් කරමු.

රචනය – සිතුනි මිමාෂා

සංස්කරණය – ඉසුරු අකලංක